Matthew 14
Yohane misa-lowac weibong
Mrk 6:14-29; Luk 3:19-20; 9:7-9
1Dameng iwa Yesule siducti ngictau Herode, yele hedecka haume 2ye ngagelu bole-ngicfocine edocebawec, “Yogo Yohane misa-lowac. Yedi homackacni gboliyelu fangkegacte pasi tapiliineholec banale tapili facnogac.”3I yangucte, Herodedi Yesule siduc mi ngagelu esecne gbaine Filipte ngigac Herodias hise bawec. Bame Yohanedi yanguc edowec, “Ga ngigac i balu yeholec gagamec, yogo yefe monic mi fagac.” Inguc miwecte Herodedi Yohane balu hige-moleine dodockelu muc-macka lolu a 5wehomanogale ngagesiwec. Aime ngic-ngigac yenge ye Wapongte siduc mimi, inguc ngageibongte ailu hangocebawec. b
6Aime Herodele fike-fike dameng kwesime ngic-ngigac yenge yela tumannelu ngiyeebongka Herodias aduinedi yengele hewacka fangkelu gee wewec. Weme Herodedi ngani-angac aicnolu 7yowa sanangne milu yanguc mipangkewec, aduine ye wiyac monicte aicnome yogo nalic lacnodaicte. 8Mipangkeme adu ye nenggacinedi ngage-ngage lacnome Herode edowec, “Ga Yohane misa-lowacte hodoc welockebong pelewa lolu bawelelu neledamec. Aime ngagedabelengte, ye homagac.” 9Inguc mime ngictaudi ngagelu kwele-umac ngagewec. Ailu ye ngic-ngigac ngiyeibong yengele dongewa yowa sanangne mipangkelu miwec, i ngagesiwec, ilec aduinele yowa ngagewec, Yohanele hodoc yogo lacnonale mipangkelu 10hudu-baba ngic monic saleme lelu Yohane muc-macka ngiyewec, ye ubeine welockewec. 11Welockelu hodocine pelewa lolu bawelelu aduine lacnome adudi nenggacinela balewec. 12Aime Yohane mic-tengtengfocine yenge hikelu kponggbongine bahikelu longkeibong. Longkebong motome hikelu Yesu siduc yogo edoibong.
Nosing gumecebawec
Mrk 6:31-44; Luk 9:10-17; Yoh 6:1-13
13Edobong Yesu ye siduc i ngagelu mac-himong yogo hegilelu wagewa felu mic-tengtengfocine yengeholec mac-himong monic ngic mikacka, iwa ye yeicnac ganale hikewec. Aime ngic-ngigac habutowadi yenge yogo biyac ngagelu taonngineng hegilelu hige-yefe balaibelu hikeibong. 14Hikebong Yesu ye wagewacni walu ngic-ngigac habu sugucne inguc nganicebalu kweleine sowaleme ngic-ngigac hucnginengkolec bamadicebawec.15Bamadicebalu gacgume mac aweleme mic-tengtengfocine yengi yela lelu miibong, “Himong yago ngic mikac, aime dameng biyac miyac aigac, ngic-ngigac habutowa yago salecebang mac-himong gocna hikening. Yenge hikelu yengung nosing fuli banoc aining.”
16Inguc mibong yedi yanguc edocebawec, “Yenge hike-hikelesoc mi aigaing, ngenge ngengung nosing gumecebadabiyeng.”
17Inguc mime yengi miibong, “Nonge bret 5 nga misa-sic yaeckang sugu bagagabeleng.”
18Inguc mibong yedi yanguc miwec, “Ngenge nosing yogo nala bawelening.” 19Yesu ye inguc milu ngic-ngigac habutowa kpindingka wangiyeningte edocebawec. Edocebalu bret 5 ailu misa-sic yaeckang, yogo balu dongeine hilame honocmengka feme kwele-madic milu milockewec. Milockelu bret i badulu mic-tengtengfocine yeleme yengi balu ngic-ngigac habutowa yelebong noibong. c 20Aime yenge sasawadi nogebec ailu nosing tofaine notiwa aibong ngiyewec, i kpaduckebong haulu damba 12 wakewec. 21Ngic-ngigac nosing noibong, yogo yengelacni ngic yengele dzalengineng i 5 taosen ingucne. Nga ngigac adu-madec noibong yengele dzalengineng i monic mi wafeibong.
Lifuc feina hikewec
Mrk 6:45-52; Yoh 6:16-21
22Damba wakeme Yesu ye mic-tengtengfocine yoingebalu salecebame yenge wagewa felu lifuc nebocina molickelu hikeibong. Hikebong ye yeicnac galu ngic-ngigac habutowa locebame hikeyackeibong. 23Hikeebongka ye milockenale kupicka feme mac deboleme yeicnac ngiyewec. d 24Ngiyeme yenge wagewa biyac lifuc hewacina hikeebongka gbelong sugucnedi yenge hikedaingtewa yefe kwesilu dibongti wage welu bafangkeme fec-wac aiwec.25Inguc aime mac biyac saenogale aiyemewa Yesu ye lifuc feina edela edela mic-tengtengfocine yengela hikewec. 26Ye lifuc feina edelu hikeme mic-tengtengfocine yenge nganilu yanguc miibong, “Ilucti welegac.” Inguc milu hangocebame aukweibong. e
27Aukwebong Yesudi ngagelu iwahac yanguc edocebawec, “Nani welegabac. ▼ Ilec ngenge mi hangocngebana, kwelengineng fangkegac, i wana.”
Pita misa feina hikewec
28Inguc mime Pitadi hefaliyelu miwec, “Sugucne, ga geicne welegic ingucnehac, na misa feina edela edela gala fubele minelec.”29Inguc mime Yesudi miwec, “Ga welec.”
Inguc mime Pita ye wagewacni walu misa feina edela edela Yesula lewec. 30Leemewa dibong gbelong sugucne weme nganilu hangockewec. Inguc aime misawa haunogale ailu hangockeme aukwelu miwec, “Sugucne, ga baficnunong.”
31Inguc mime Yesu ye moleine biyac sungkelu Pitale mole balu bafangkelu yanguc edowec, “Ga ngage-ngagesinggone kpisicnemac, ga omale ngageboc aigic?” Inguc micnowec. g
32Micnolu yeke wagewa feebocka iwahac gbelong miyac aiwec. 33Aime wagewa ngiyeibong, yenge Yesu afeelu yanguc miibong, “Foinac, ga Wapongte Madec.”
Ngic-ngigac hucnginengkolec
Mrk 6:53-56
34Aime yenge lifuc falockelu Genesaret himongka hike sulumeibong. 35Iwa hikebong himong yogolec ngic yengi Yesu biyac ngani-motolu yowa lobong hikeyackeme yenge ngic-ngigac hucnginengkolec yela bacebalu kwesiibong. 36Kwesilu hucnginengkolec yenge ngakpi daleinele muc susucine sugu oiyaningte dogbac ailu micnoibong. Dogbac ailu oiyaibong, yenge sasawadi madickeyackeibong. h
Copyright information for
MPP